حياة الفرى لانس او العمل الحر …

حياة الفرى لانس او العمل الحر …

حياة الفرى لانس او العمل الحر …

حياه الفرى لانس او العمل الحر زى ما بيقولو عليه … انا جالى اسئله كتير عن الموضوع ده الصراحه وانتظرت فتره طويله وكنت ماجل الموضوع لحد ما اخلص باقى التدوينات اللى فاتت

اى حد حتفتح معاه الموضوع بتاع الفرى لانس اول سوال حيسالهولك الفرى لانس احسن ولا الفول تايم … خلاص الناس كلها م متبرمجه على السوال ده ….بس انا حتكلم فى الموضوع ده من صوره تانيه مش من الزاويه دى بس

وانك تحكم على الموضوع بصوره مين احسن دى عمليه نسبيه بحته تختلف من حد للاخر فلو بتفكر تدخل الموضوع ده وتبدا شغلك كفرى لانس دى خطوه كويسه والموضوع حيفيدك وحيفيد اى حد شغال فرى لانس لسا مبتدا

كل الكلام ده حيكون من وجه نظر بوليكا ممكن يناسب حد تانى ووممكن ليه ووجهه نظرى دى بناءا على الخبره اللى قضتها فى الفرى لانس لانى بدات فرى لانس وقعدت شويه فول تايم ورجعت فرى لانس تانى ….

خلينا نتعرف الاول على مفهوم الفرى لانس الصحيح لان فى ناس فهماه غلط

الفريلانسر او العامل الحر هو شخص يعمل لحساب نفسه مسول عن كل حاجه خاصه بالعمل فهو يعمل كفريق عمل كامل من اداره المشروع والوقت والامور الماديه وكل التفاصيل دى .. وطبعا بيكون العمل ده لمده زمنيه طويله وليست حاجه موقته

اى حد بيندرج تحت البند ده مهما كانت وظفته فهو عامل حر

فى ناس كتير رابطه الفرى لانس بمواقع الفرى لانس وده غلط مواقع الفرى لانس ده مصدر من مصادر الشغل ليس الا ممكن تعتمد على عملاء مباشرين او عن طريق المعارف او الاعلان المباشر لخدماتك وحاجات كتير جدا تتندرج تحت بند المصادر

للاسف الشديد احنا ثقافه العمل الحر قليله جدا اعماللا بمبدا لو فاتك الميرى اتمرمغغ فى ترابه
والدخل الثابت حلو وانت بتتبقى مستريح وبتقبض اخر شهر

الكلام ده فى ناس بتتكيف معاه وفى ناس مش بتتكيف معاه وده وارد جدا بس كثقافه عامه للموضوع لسا مش منتشره اوى

للعلم ان الفرى لانس اصعب كتير من الشغل الثابت بس هو بيكون على حسب اولوياتك وطموحك انت اللى بتحدد انت شايف نفسك فى ايه وايه اللى مناسب ليك

اكتر حاجه واجهتنى صعبه وانا بكتب الموضوع ده هو ترتيبه لانى بقالى فتره كبيره بحضرله وكل حاجه بتيجى فى دماغى بكتبها وبصراحه ملقتش حل للترتيب

فا انا حتكلم فى النقط كل واحده تحت التانيه واللى محتاج اى استفسار انا حكون سعيد بده

ليه العميل اصلا بيعوز يشتغل مع مصمم حر ؟؟

– اولا سهوله التعامل معاه وانو يقدر يوصلك ويقابلك وتقابله
– الفلوس طبعا واللى هو بتبقى اهم جزء فى الفرى لانس انوو بيعوز حد سعره كويس
– انو يكون حد محترف ومحتاج الفرى لانس ده فى حد ذاته باى سعر وفى ناس كتير جدا
– الوقت خصوصا لو كان مستعجل والوقت حيفرق معاه
– تجاربه السابقه مثلا مع الشركات ومرتحش

ايه اصعب حاجه حتقابلك لما حتشتغل فرى لانس ؟؟

– اول حاجه حيكون الدخل مش مستقر خصوصا فى البدايات فلازم يكون ليك مصدر دخل تانى بقدر الامكان
– تنظيم الوقت وانك متحطش قواعد لنفسك وشروط كويسه وانت بتتعامل مع العميل ومواعيد شغلك تكون مش متنظمه
– التعامل مع العملاء بمختلف تفكيرهم وانك تقدر توصل معاه لحاجه مرضيه من الطرفين

طيب وايه مميزات الموضوع ؟؟

– اولا انك بتشتغل الشغل اللى بتحبه واللى على مزاجك
– اول ما تبدا الدنيا تمشى معاك حتحس انك مرتاح نفسيا فجوده الشغل بتاعك حتعلى
– زياده الدخل خصوصا لو انت شغاله جمب شغلك
– الربح حيكون ليك والخساره انت اللى حتشيلها برده
– ممكن تتحكم فى العملاء اللى طالبين منك شغل بزياده او نقصان السعر

انت محتاج ايه علشان تبدا شغلك الحر ؟؟

لو حابب تبداه جمب شغلك الاساسى وقادر تمشى ده مع ده ابداه لو حابب تاخد خطوه الاستقلال فكر فيها كويس ولو حسيت انك شغلك الخاص بالنسبالك افضل وخصوصا لو انت راسم لنفسك انك بتبنى كيان ليك مش مجرد شغل بيدخلك سبوبه ده تفكير كويس جدا وحيساعدك انك حتوصل فتوكل على الله وابدا شغلك الخاص

فى نقط حتكون محتاجاه ودى حتيجى مع الخبره فمتقلقش لو مش عندك محدش بيتعلم بالساهل

– انك تظبط وقتك كويس وتعرف تديره عارف عليك ايه النهارده وبكره ولمده اسبوع او شهر
– انك يكون عندك تواصل كويس مع اللى حواليك وتقدر تنتشر سوال عن طريق السوشيال ميديا او الاتصال المباشر بين الناس
ابدا اتحرك وانزل افيناتات خليك متواجد على كل السوشيال وضح الخدمات اللى انت بتقدمها …
– انك تقدر تقدر الوقت اللى حياخده منك المشروع والفلوس اللى حيتكلفها وده عمره ماحيجى من اول مره صح فمتقلقش لو
فى اول مشاريع بتعملها ان مشروع حسيت انك ادتيلو سعر قليل ومشروع وقت قليل ده طبيعى جدا
مفيش حاجه حتطلع معاك مسطره سواء سعر او وقت كلو حيتظبط معاك بعد كده متقلقش

– انك تقابل الكلاينت وتتفاهم معاه وتحاول تنهى المشروع لصالحك ده لو كان كلاينت مباشر او لو غير مباشر ازاى تبدا تبعتلو ميل وتشرحلو ويشرحلك واللفه الطويله العريضه دى الللى بتحتاج نفس طويل خصوصا لو الكلاينت بيبقى ب
بيكلم 5 او 6 فرى لانس فى نفس الوقت مستنى منهم اسعار .

امتا طيب حتقول للكلاينت لا سواء انت لسا بتبدى او بخبره قليله ؟؟

خلينا نكون متفقين ان لا دى مش علشان انت جامد او منفوخ ولا الكلام اللى حتسمعه كتير ده
بس كل القصه انك بتحافظ على نفسك وبتبدا تعلى من مستواك وده حقك

– لو لقيت الكلاينت عمال بيفاصل ودى طبيعه وغريزه فطريه بشريه عن ناس كتير انو يحب الفصال –
ممكن انت لو قولتو الحاجه حتتكلف جنيه يقولك طب متخليها نص 😀

– لو هو من النوع المماطل فى ناس بعد ما توافق على سعر حاجه والدنيا تمام ممكن تغيب فتره
وتيجى تانى ايه الاخبار طيب مينفعش دى تقل انا حبدا ده دلوقتى وبلاش ده اصل الحكايه … اصل الروايه
احنا معادنا امتا طب خليها بكره …. حاجات كتير جدا بتبيلك ان الراجل ده مش بتاع شغل

– العميل بقا المتردد اللى هو مش عارف هو عايز ايه … وده مشكله المصممين تحديداا
الطاحونه حمره ولا خضره انا شايف دى افضل من دى طب غير طب شيل طب حط …
طيب متيجى انت تشتغل مكانى وخلاص طالما انت فاهم وعارف كل حاجه
وده برده زى العميل اللى فاهم انو فاهم كل حاجه … واللى ده من نوعيه العملاء المتعبين جدا جدا خصوصا لما يبان انو مش فاهم اصلا ولا حاجه ومجمع كلمتين تلاته من كتر ما بيتعامل مع فرى لانس وده يقوله حاجه وده يقوله حاجه

والموضوع ده حيبان جدا معاك لما تبدا تتوسع ويكون ليك علاقاتك مع مصممين تاننين ممكن تلاقى العميل ده فات عليهم كلهم ويقولك انا اول واحد اكلمه :3

البيت ولا المكتب ولا اشتغل فين ؟؟

انا السوال ده ملهوش اجابه عندى انت اشتغل فى الحته اللى شايفها مرياحك ممكن تشتغل فى بيتكم
تاجر مكتب وتشتغل فيه – تنزل ورك اسبيس – تقعد فى كافيه زى مانت حابب ومتعود

الفلوس بقا والدفع ؟؟

دى اهم قصه بتورق الشباب من الجنسين
هل حيضحك عليا ولا ايه انا خايف ابعت الشغل وماخدش الفلوس

طيب احنا خلاص حنسعر المشروع والمشروع تسعيرتو حتتحسن معاك مع الوقت متقلقش
حتبدا تطلع سعر مظبوط كل مره حيكون افضل من التانيه

احنا عندنا حالتين
اول حاله هو سعر المشروع الثابت والحاله التايه اللى بتكون على حسب ساعتك بكام والعداد بيعد

خلينا فى الحاله الاولى

اللى هو سعر ثابت انت خلاص شوفت البروحيكت بعد ما بعت للعميل حاجه اسمها Design Brief
فهمت هو محتاج ايه وكلمتو وقابلتو … خلاص حان وقت الجد بتجهز اوفر بالتفاصيل كلها بتاعت البروجيكت
وده حيستلمه امتا والبروجيكت وقته ازاى ومين قبل مين والدفع حيكون عن طريق ايه
وسعر البرروجيكت كزا … وانا محتاج مقدم شغل 50%
عايز تقلل النسبه دى زى ما تحب فى ناس كتير ماشيه 50-50
وده مينفعش فى البروجيكت الطويله لو البروجيكت اكبر من شهرين
قسم الفلوس دفعات خصوصا اخر 50 فى الميه من الفلوس

ومتبداش شغل باى شكل من الاشكال او الاحوال من غير ماتكون فلوسك معاك .. وده حقك الموضوع مفهوش اى نوع من انواع الاحراج هو مش بيتحرج لما بيطلب تعديل او حاجه زياده وده اكل عيشك اصلا

تانى طريقه هيا طريقه الساعه

وده بيكون فى الغالب فى البروجيكت الكبيره وطرق حساب الساعه كتير جدا وانا من وجهه نظرى الموضوع بيعتمد عليك انت
وعلى خبرتك كل ما خبرتك تعلى كل ما ساعتك حتكون اعلى … فى ناس بتمشيها بالساعه وفى ناس بتمشيها بالاسبوع او اليوم … كل واحد وكلو بيعتمد على حساب الساعه نفسها

الطريقه المشهوره فى حساب الساعه بتكون كده
انك بتقسم المرتب بتاعك او اخر مرتب انت اخدته او المرتبات اللى ماشيه فى السوق على 22 يوم وده عدد ايام الشغل الفعلى فى الشهر على 8 ساعات ودى عدد الشغل الرسمى فى اليوم واللى بيطلع بتضربه فى 2
ده رقم ساعتك لو حسه انو قليل زوده بنسبه تعادل خبرتك

فى طريقه تانيه احترافيه اكتر ممكن تشوف خطواتها على اللينك ده
http://instacalc.com/
ودى طريقه مستفيضه
http://goo.gl/7uX3LU
انت واللى يريحك

دى شويه بوينت كده لازم تاخد بالك منها خصوصا فى الاول

– متبداش مشروع جديد الا لما تكون دارسه كويس وعارف وقته مناسبك ولا لا لازم تكون عارف حجم المشروع كويس قبل ما تبداه متفرحش بالسعر العالى فى بروجيكت حياخد منك 6 شهور شغل مثلا اى عميل بيبقى شايف ان الحاجه بسيطه

– خلى كل حاجه بينك وبين العميل بتاعك تكون عن طريق الميل افصل اى حاجه تانيه لا فيس بوك ولا سكايب ولا موبايل كل حاجه رسمى على الميل ودى نصحيه حتعرف قيمتها لما تجربها خصوصا لو انت متعود على موضوع التلفون

– افصل العملاء بتوع عن حياتك الشخصيه والخاصه والسوشيال ميديا بتاعتك حقك انك تمارس حياتك الخاصه ودى حاجه بعيده عنو ملوش فيها طالما انت ملتزم معاه بمواعيد التسليمات بتاعتو

– انت راس مالك الوقت بتاعك فمضيعش وقتك مع عميل باين عليه انو مش بتاع شغل ودى حاجه حتعرفها برده مع الوقت

– متقلقش انك تحط شروطك على العميل حتى لو انت بادى ده بيزود منك مش بيقلقلك على فكره وحيخليك مرتاح جدا فى البروجيكت بتاعك لما الموضوع يتم … وشروطك دى طرق الدفع وحيستلم امتا وايه قبل ايه وكل الكلام ده

– كل ما حتاخد تفاصيل اكتر منو كل ما حتكون مرتاح وده مش معناه انك لسا مبتدى فى ناس كتير مش عارفه هيا عايزه ايه وانت المفروض اللى بتسهلها الموضوع وتقربه ليها

– اى عميل حيقولك خلينا نبتدى ونشوف الدنيا حتمشى ازاى وقدام حبعتلك الداتا والتفاصيل اعرف انو حيتعبك

– فى فرق بين العميل المباشر والعميل اللى جايلك عن طريق مصمم مثلا زميلك بيحدف عليك شغل بيكون فى فرق فى السعر بسيط خصوصا لما بتكونو انتو الاتنين تيم ورك واحد مصمم والتانى مبرمج

– كل ما تقفل مشروع راجعوه واعرف ايه النقط اللى مكنتش متظبطه فيه معاك سواء وقت او فلوس او انك ماخدتش الكلام كويس من العميل ده حيفرق معاك مع كل مشروع حتبدتيه

– خلى عندك وقت لنفسك كل فتره انك تزود من علاقاتك فى الواقع وانك تبان وسط الناس الحياه مش كلها بتكون شغل

– مينفعش العميل يطلب اضافات جديده غير المتفق عليها الا بفلوس اضافيه ومينفعش برده يطلب تعديل يغيرك الموضوع راسا على عق

– ببساطه اى حد يقولك اعمل معايا واجب وانا حجيبلك شغل كتير كل الكلام ده انساه .. انت وراك التزامات محدش حيجيى يدفعلك ايجار مكتبك .. ايجار مكتبك بيدفع فى الوقت الحالى مش فى المستقبل

– فى ناس كتير بتلاقيها شايفاك انت فرى لانس طيب اعملى دى مجانا كده …. انا معنديش مشكله فى المبدا ده بس فى حدود واهم حاجه يكون فى مقابل انت حتستافد منو مش لازم يكون فلوس ممكن حيجيلك دعايا كويسه من وراه

– فى حاجاتين لازم تسمعم من اى عميل … ياااه انت اسعارك غاليه اوى كل زمايلك اسعارهم اقل وان الموضوع ده بسيط جدا .. متقلقش …. انا مش متعب 😀
وكمان قلى سعر رخيص انا معايا شغل كتير جدا والحياه حتبقى زلابيه 😀
انت بتعرف تعمل كده ؟؟ طيب انت مكلمنى على اساس ايه ؟؟
ابعتلى نماذج لشغلك ؟؟ طيب انت مكلفتش خاطرك ودخلت على الويب سايت وشوفت ؟؟

– خلى عندك وقت لتسويق نفسك وانك تتابع العملاء القدام بتوعك حتى رساله كل سنه وانتو طيبين فى رمضان والعيد

انا كان نفسى الموضوع يكون مرتب اكتر من كده
بس انا ححاول على ترتيبه وتحديثه
لو حد حابب يستفسر عن حاجه اهلا وسهلا بيه

تحياتى
كل عام وانتم بخير

The following two tabs change content below.

Ahmed Bolica

Founder and CEO of Bolica Web Design at Bolica web Design
I`m a UX Designer, Web Designer, UI Developer and SEO Specialist based in Alexandria, Egypt . I’m lucky because I really love what I do. I am currently work as Co-Founder of Alexandria Web Designers.

Latest posts by Ahmed Bolica (see all)

  • Mardy El-Zaawely

    انت برنس وربنا يا بوليكا 😀 😀 😀

  • Heba El Deeb

    حلو جدا بجد 🙂

  • رحال

    شكرا جدا ليك

  • asarsat

    Mersi kteeeeeeeeer

  • Sayed Sikoo

    الف الف شكر على النصائح المهمه دى بس مقولتليش ابدأ الاقى عملاء على النت ازاى؟

    • مع الشغل اللى حتبدا تنزله حتى من غير كلاينت حتلاقى الدنيا ابتدت تمشى معاك

  • Tarek Bassiouny

    كلام جميل وشكرا على النصائح واحلى حاجة فى الموضوع انك على طبعتك

  • جميل يابوب , جميل فعلاً , النقط اللي انت وضحتها ممتازة بالنسبة ليا كواحد لسة هيبدأ الفري لانس وكان متردد لأنه مش عارف ايه عيوبه وايه مميزاته وطبعاً كل شخص وراه التزامات شخصية كبيرة .
    مش مجاملة صدقني , بس انت حطيت خبرتك كلها في المقال وانا كشخص لسة هيبدأ كفاية احط النقط دي قدامي واقيم نفسي واحدة واحدة عليها 🙂

    مستني مقالات تانية ياكبير 🙂

  • Hassan Khaled

    المقال حلو و ترتيبه مش وحش .. بالعكس هو كده تماام اوي

  • Abdallah Omran

    بجد استفدت من المقال ده كتيير تسلم ^_^

  • Amr Atef

    بس انت نسيت حاجه
    ازاي اجيب العميل
    ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

  • DoAa GaBer MaBed

    انا ان شاء الله حابه ادخل موضوع الفري لنس بس لسه بخد فكره عن الموضوع ومعرفش مواقع اللي بتختص بالموضوع ده فلو حد حابب يساعدني